رجعت لك تانى ياصاحبى، لما يقولك مشوفتنيش وأنا بزعق؟ قوله على طول شوفتك انته كان منظرك يجنن وكنت ميه ميه وحطيت كل الناس فى بطنك وما حدش قدر يفتح بقه معاك ده انت محصلتش ده انته وانته...بس وانت بتقوله راقبه وانظر فى وجهه واستمتع بمنظر الانتصار والنشوة واديه كمان واستمر فى النفخ بس حاسب قبل ما يفرقع لازم تمشى بعيد علشان ما يصيبكش حاجة لا قدر الله لو اتنطر منه حاجة كده ولا كده...

من كام يوم شفت مسجد بيتبنى هتقول لى جميل، هقول لك طبعا لحد كده جميل وطيب لكن أنا شوفت الناس عند المسجد مختلفين بس الغلبة والصوت العالى لمجموعة منهم عاوزة تخلى سلم المسجد فى الشارع وحجتهم أنهم مش عاوزين يضيعوا صفين من المسجد لو أصبح السلم داخلى وبطريقة جميلة راقية، ويجب أن لاننسى أن معهم ناس انضمت لهم علشان صوتهم عالى وغالبا مايعرفوش أيه الموضوع اصلا، أما أصحاب الصوت الضعيف كانوا بيقولو المسجد كبير والمساجد كثيرة والأرض كلها مسجد بس احنا عاوزين نعمل المسجد جميل وتحفة معمارية تسر الناظرين ولا نسد الطريق أمام الماره، لكن مجموعة الصوت العالى عاوزين يطلعوا فى الشارع بالسلم وبيقولوا لايهمنا الشكل والمنظر وإن شاء الله يبقى زى الكشك، ولما الطرف الآخر يقول لهم الطريق والشارع يزعقوا فيهم بصوت عالى قوى ده مسجد يا ظلمه يامجرمين حرام عليكم، يرد عليهم الصوت الآخر الضعيف  بس ربنا لا يرضى الظلم والتعدى على الطرق وغلق طريق الناس، يعاودون صراخهم يا ظالمين يا مفترين  يا....يا.....تعرف أظرف حاجة فى الموضوع ايه يا صاحبى اننى عرفت ان معظم اللى كانوا بيزعقوا أصلا ما بيصلوش، طبعا انتصر أصحاب الصوت العالى، هتقولى مين قال لك هقولك لما عدت مرة آخرى من نفس المكان لقيت السلم فى الشارع وسده وكله تمام، بالطبع كل واحد من أصحاب الصوت العالى كان نفسه حد يصوره وهو بيزعق ان شاء الله حتى ولو على الموبايل ويأخذ الصورة يوريها للمدام والأولاد، لكن للأسف يظهر ان ما حدش صور ناس وحشه محدش بيفهم فى الأصول، كانوا هيخسروا ايه لو واحد طلع موبايله وصور، لكن هتقول ايه؟ ناس وحشه ومبيحبوش الخير وحقد كمان، يله على كل حال محلولة،  يرجع على البيت يرزع الباب و يحاول ياخد نفس عميق ويظفر كام طفرة، وعلى طول أم العيال هتسأله فيه ايه يا أبو تامر؟